Papa Françesku tha në meshën e të dielës se bota po shënon një “Pashkë lufte” dhe bëri thirrje për paqe në Ukrainë, e cila sipas tij po zvarritet në një “luftë mizore dhe të pakuptimtë”.
“Ne kemi parë shumë gjak, shumë dhunë. Zemrat tona gjithashtu janë mbushur me frikë dhe ankth”, tha Papa teksa jepte bekimin e tij vjetor të Pashkëve “Urbi et Orbi”.
“Paqe për Ukrainën e shkatërruar nga lufta, e sprovuar kaq rëndë nga dhuna dhe shkatërrimi i luftës mizore dhe të pakuptimtë në të cilën u tërhoq. Në këtë natë të tmerrshme vuajtjesh dhe vdekjesh, le të shfaqet së shpejti një agim i ri shprese! Të ketë një vendim për paqen, le t’i jepet fund përkuljes së muskujve ndërsa njerëzit vuajnë”, tha Papa Françesku nga ballkoni i Bazilikës së Shën Pjetrit pas Meshës së Pashkëve.
Rreth 100,000 njerëz morën pjesë në Meshën e Pashkëve në Sheshin e Shën Pjetrit dhe zonat përreth, sipas zyrës së shtypit të Vatikanit. Midis tyre ishin disa politikanë ukrainas, duke përfshirë Ivan Fedorov, kryebashkiak i zgjedhur i qytetit të pushtuar ukrainas të Melitopolit, i cili u arrestua nga forcat ruse muajin e kaluar dhe u akuzua për vepra terrorizmi.
“Unë mbaj në zemrën time të gjitha viktimat e shumta ukrainase, miliona refugjatë dhe persona të larguar nga vendi, familjet e ndara, të moshuarit e lënë, jetët e thyera dhe qytetet e rrafshuara me tokë. Unë shoh fytyrat e fëmijëve jetimë që ikin nga lufta”, vazhdoi Papa Françesku.
Papa theksoi gjithashtu aktet e bamirësisë mes “dhimbjes së luftës”, si “dyert e hapura të të gjitha atyre familjeve dhe komuniteteve që po mirëpresin emigrantët dhe refugjatët në të gjithë Evropën”./Opinion.al
