Më mbi 241 mijë raste me koronavirus, Brazili është kthyer në një prej epiqendrave të pandemisë.
Teksa ka tejkaluar Italinë dhe Spanjë, shteti i Amerikës Latine u bë i katërti në botë për nga numri i infektimeve pas SHBA-së, Rusisë dhe Britanisë së Madhe.
Vendi pati edhe një bilanc të hidhur të jetëve të humbura, me mbi 16 mijë e 100 viktima. Qyteti më i madh në vend, ai i Sao Paolos, po mban mbi supe peshën më të rëndë, e sipas kryebashkiakut Bruno Covas, sistemi i shëndetësisë është pranë kolapsit.
Presidenti i Braizilit, Jair Bolsonaro është kritikuar ashpër brenda e jashtë kufijve për mënyrën se si e menaxhoi krizën shëndetësore.
Ai sfidoi udhëzimet globale për distancim social të dielën, kur pozoi krah mbështetësve dhe fëmijëve në kryeqytetin Brazilia, teksa vijon të kundërshtojë masat e izolimit, me pretendimin se distancimi social vetëm sa do të rrënojë ekonominë./Opinion.al
