Mbi 1.1 miliardë dollarë pritet të humbë Shqipëria nga shpenzimet e munguara të turistëve të huaj, sipas skenarit bazë që parashikon për këtë vit Këshilli Botëror i Udhëtimit dhe Turizmit.
Rreth 3.5 milionë vizitorë të huaj do të humbasë industria që zë 21,2% të Prodhimit të Brendshëm Bruto në Shqipëri.
Turizmi është sektori ku mbështetet edhe rritja ekonomike e Shqipërisë. Gjatë 5 viteve të fundit 1 në 4 vende të reja pune kanë qenë në këtë sektor i cili duket se është ai që po vuan më shumë pasojat e pandemisë.
Përllogaritet se këtë vit gjysma e subjekteve të lidhura me turizmin do të qëndrojnë të mbyllura veçanërisht për stafin sezonal që punësohet gjatë sezonit veror.
Humbja prej 1.1 miliardë dollarësh e këtij sektori përllogaritet të jetë 76% e të ardhurave totale të cilat këtë vit synohen të rikuperohen nga pushuesit vendas.
Kjo duket e vështirë dhe do të shihet vetëm në fillim të muajit Gusht e në vazhdim pasi operatorët deklarojnë se janë duke u mbështetur thuajse tërësisht në paketat e minutës së fundit për këtë vit./ Opinion.al
