Ministri i Shtetit për Diasporën, Pandeli Majko, është shprehur ditën e sotme në Kuvend se ka ardhur koha që të ndryshohet Kushtetuta e Shqipërisë.
Teksa ka marrë shkasë nga djegia e mandateve në bllok të opozitës, Majko u shpreh se me ndryshimet e Kushtetutës kush braktis sistemin duhet të paguajë edhe me ekzistencën legale.
“Pjesëmarrja në sistem është e vetmja rrugë për zgjidhje. Ka ardhur koha për të diskutuar ndryshimin e Kushtetutës, ku mes të tjerash të jetë edhe parashikimi se kush braktis sistemin duhet të paguajë edhe me ekzistencën legale. Kush mendon se politika është vetëm për të përfituar kufizon veten nga frika. PD duhet të rikthehet në Kuvend”, tha Majko.
Në fjalën e tij në Kuvend, ish ministri Ditmir Bushati deklaroi se “debati politik për rezolutën e Bundestagut gjerman është disi artificial”.
“Është vendi që ka investuar më shumë në procesin e zgjerimit dhe në këtë kontekst, në rast se flasim për kushte, besoj se të gjithë duhet të flasim për nevojën për të rritur standardet në jetën e përditshme. Prandaj është absurde lufta politike, e cila kërkon të legjitimojë kauzën e saj përmes disa detyrave të shtëpisë që na i përcakton Bundestagu gjerman, që në fund nuk janë detyra vetëm për Shqipërinë, por edhe vija e sjelljes që një parlament demokratik i përcakton qeverisë”, tha Bushati.
“Ne kemi notuar kundër rrymës dhe po notove kështu nuk ke dot sukses. Kjo është arsyeja që kam propozuar pakt kombëtar për Evropën, ku secili bën detyrat që i takojnë. Nuk diskutohet që barrën kryesore e ka qeveria, por përgjegjësia është e përbashkët. Shqetësimet e vendeve anëtarë të BE-së nuk janë çështja themelore, çështja themelore është ku jemi ne? Me këtë rezolutë shpresoj që të hedhim një hap për detyrat që duhet të ushtrojmë ne si Kuvend”, theksoi më tej ish ministri Bushati./ Opinion.al E.Xh.
