Ministri i Bujqësisë, Edmond Panariti shpreh vendosmërinë e tij për të siguruar dëmshpërblim për fermerët që humbën kafshët e tyre, për shkak të dermatozës nodulare.
Ministri Panariti në “News24”,tha se infeksioni preku rreth 400 krerë kryesisht në zonat e Dibrës, Kukësit e Hasit, të cilat u asgjësuan për të shmangur përhapjen e virusit.
Ministri Panariti theksoi se tashmë që rreziku i përhapjes së virusit është reduktuar, vëmendja është kthyer tek gjetja e mënyrave të kompensimit për fermerët.
“Shqetësimi dhe vëmendja imë është për te gjetur mënyrat e kompensimit. Kam një ide që kompensimi të mos bëhet me para, por dëmet të zëvendësohen pikërisht aty ku kanë ndodhur.
Duke zëvendësuar kafshët e asgjësuara me kafshë të shëndosha dhe prodhimtare. Kam filluar dialogun për të gjetur kontingjentin e kafshëve që do tu shpërndahen këtyre fermerëve. Të zëvendësojmë sa më shpejt ato 400 krerë që u detyruam ti asgjësonim.” deklaroi ministri Panariti. Ministri garantoi konsumatorët e mishit se dermatoza nodulare në asnjë rrethanë nuk prek njeriun.
“Ndalesa që i bëmë mishit nuk kishte të bënte me rrezikun që paraqiste për konsumatorin. Ka qenë rreziku që nëpërmjet mishit të transmetohej virusi tek kafshët e tjera, por në asnjë rast ky infeksion nuk prek njeriun. Eshtë një infeksion tipik vetëm i gjedhit. Mbulesa e vaksinave garanton që imuniteti që vendoset në kafshë, shtrihet
për dy vite. Për dy vitet në vazhdim kafshët që janë të vaksinuara e ruajnë imunitetin dhe qëndrueshmërinë ndaj këtij virusi.” u shpreh ministri.
Lidhur me hapjen e thertoreve dhe tregjeve të mishit, ministri i Bujqësisë tha se do të duhen të paktën edhe 10 ditë për normalizimin e situatës.
