Ish-deputetja e Partisë Demokratike, Oriola Pampuri ka qenë sot në Thumanë nga ku ka akuzuar kryeministrin Edi Rama se aty nuk është bërë asnjë punë.
Duke folur pranë një masivi rrënojash në një nga zonat më të goditura nga tërmeti i 26 nëntorit, Pampuri tha se Thumana vazhdon të jetë një rrënojë e madhe.
Pampuri deklaroi se kryeministri Rama premtoi nga i njejti vend 56 ditë më parë se brenda 6 ditëve të gjitha mbetjet do të pastroheshin por kjo nuk ka ndodhur.
“Këtu jemi në Thumanë, ku për fajin e qeverisë humbën jetën nga tërmeti i 26 nëntorit 22 qytetarë. Për ta nuk ka akoma drejtësi, por me Edi Ramën, e keqja nuk ka fund. Thumana vazhdon të jetë një rrënojë e madhe, sepse Edi Rama nuk do t’ia dijë për qytetarët. Ai mendon se me propagandë mund t’i bëjë shqiptarët për budallenj. Para 56 ditësh, Edi Rama ishte në të njëjtin vend ku jam unë tani. Ai premtoi se brenda 6 ditëve të gjitha mbetjet do të hiqen e do të pastrohen, do të punohet me 3-4 turne për të shkuar drejt normalitetit. Asgjë e tillë nuk ka ndodhur. Edi Rama bën vetëm show dhe nuk punon. Ai faktohet edhe një herë si një gënjeshtar dhe mashtrues i pafytyrë.”- tha Pampuri.
“Edi Rama nuk punon as me tre turne, as me katër turne, siç premton gjatë shoë-t propagandistik. Edi Rama nuk punon fare. Ai është një kryeministër i dështuar, që na ka shkatërruar ekonominë, ka varfëruar gjysmën e shqiptarëve dhe po çon drejt falimentimit me mijëra biznese, sepse nuk ka punuar për qytetarët, por për një grusht oligarkësh. Nuk ka sesi Edi Rama të punojë për shqiptarët, kur atyre u heq të drejtën për të lëvizur e për të punuar, ndërsa për vete bën udhëtime të fshehta luksi me avion privat. Fytyra e vërtetë e Edi Ramës janë këto rrënoja të Thumanës. Është fytyra e një dështimi të tmerrshëm, nga i cili na duhet të ndahemi një orë e më parë.”- shtoi ajo. /Opinion.al
