Kryeministri i vendit, edhe pse është me pushime nuk harron të përshëndesë ndjekësit e tij në facebook çdo mëngjes. Dhe sot ka zgjedhur një video nga kryqëzimi i ri në Milot. Duhet thënë që në krye të herës se aksi Tiranë-Fushë Krujë-Milot është më problematiku në vend, për shkak se rruga ka mbetur prej vitesh e arnuar; një pjesë autostradë, një pjesë me dy korsi e në segmente të caktuara rruga perfundon si hinkë me një korsi të vetme.
Gjithsesi muajt e fundit është punuar për mbikalimin në Milot, por ai ende nuk ka përfunduar plotësuar dhe trafiku është tejet i rënduar, sidomos gjatë fundjavave.
Por kryeministri Edi Rama që ndodhet me pushime në Dhermi, nuk ka si ta shohë si është në të vertetë kryqëzimi i Milotit, ose më saktë nuk do që ta shohë. Ai, sërish u përpoq të manipulojë opinionin publik duke paraqitur pamje “përrallore” nga rruga ende në ndërtim.
“Me këto pamje të nyjes së re të Milotit (reale dhe jo 3D siç ishin pak muaj më pare), hapur tashmë për qarkullimin e mjeteve duke lehtësuar ndjeshëm lëvizjen e dendur të këtij sezoni turistik, ndërsa vazhdon puna për rrugët dytësore deri në përmbylljen e plotë të kësaj vepre të lënë me vite rrugëve si pjesë e harruar e Rrugës së Kombit, ju uroj një ditë të mbarë”, shkruan Rama, shoqëruar me pamjet më poshtë.
Opinion.al disponon pamjet reale të rrugës së Milotit. Videoja më poshtë është filmuar ditën e diel, ku siç shihet trafiku është tejet i rënduar, pikërisht për faktin se në rrugë ende po kryhen punime. Duket qartë si mjetet dalin nga rruga me dy korsi dhe futen në gjitha si në hinkë për të vazhduar drejt Lezhës.
Nuk kemi dyshime se kur rruga të përfundojë plotësisht do të jetë zgjidhje dhe lehtësim për qindra e mijera përdorues të rrugës, që udhëtojnë drej veriut, drejt verilindjes dhe drejt Kosovës, pikërisht permes ketij aksi, por ende kemi dyshime se pse Kryeministri Edi Rama tenton ta quajë këtë “punë të mbaruar”. Pse Kryeministri thotë se trafiku është lehtësuar kur e verteta është krejt ndryshe?!
/Opinion.al
Shihni videot më poshtë dhe bëni vetë krahasimin
