Në 31 Janar, gjykata la në burg 5 të arrestuarit për rrëmbimin dhe më pas zhdukjen e trupit të 49-vjeçarit Jan Prenga. Bajram Hajri, Leonard Hajri, Elton Hajrin dhe Olsi Turja akuzohen për mbajtje peng të personit dhe armëmbajtje pa leje.
Ndërsa Festim Bexhdili, që u arrestua në Kavajë, akuzohet edhe për fshehje dhe asgjësim të trupit të viktimës. Identifikimi i tyre u bë falë pamjeve të një kamere sigurie në bodrumin e kompleksit Golden në Shijak. Disa nga këto pamje Opinion.al i ka siguruar, ndërsa tregojnë momente pak pas rrëmbimit dhe futjes së makinës tip Range Rover në bodrum.
Në këto foto shfaqen pengmarrësit dhe vrasësit e Jan Prengës, teksa largojnë trupin e pajetë të 49-vjecarit dhe përpiqen të fshijnë gjurmët e krimit.
Pengmarrësit fillimisht ishin të maskuar, por më pas në tentativë për të fshirë cdo gjumë kanë hequr maskat dhe rrobat e tyre ndërsa janë kapur nga kamera e sigurisë.
Pasi e nxjerrin trupin e 49-vjeçarit nga makina Range Rover, ata e fusin në një furgon të bardhë te mbyllur.
Edhe sipas prokurorisë, në pamje shfaqen Leonard dhe Bajram Hajri teksa kanë futur në ambientet e resortit në pronësi të tyre, trupin e Prengës me një mjet “Range Rover”.
Më pas, me ndihmën e administratorit të resortit, Olsi Turja, trupi i viktimës është transportuar në furgonin në pronësi të Elton Hajrit. Festim Bexhdili ka qenë personi që ka marrë furgonin nga resorti, bashkë me trupin e viktimës dhe e ka transportuar jashtë ambienteve, për të zhdukur më pas kufomën.
Sipas prokurorisë, në kamera shihet Olsi Turja, duke pastruar gjakun nga fugoni, si dhe duke sistemuar disa vegla pune që dyshohet se janë përdorur për varrosjen e trupit të Jan Prengës. Rrëmbimi i Prengës ka ardhur si pasojë e një përplasje që një nga vëllezërit e viktimës ka pasur me organizatorët dhe rrëmbyesit, si pasojë e disa konflikteve kriminale në Britaninë e Madhe për prishjen e pazareve të drogës./ Opinion.al
