Bota

Pamjet e kamionit me 39 viktima, kush e telefonoi policinë në mëngjes


               Publikuar në : 11:09 - 23/10/19 |
Opi Nion

39 viktima, mes tyre 38 të rritur dhe një adoleshent janë gjetur brenda një kamioni në Angli. Kamioni u gjet në parkun industrial të Waterglade, në qytetin e Essex në jug të vendit rreth orës 1:40 me orën lokale, të mëngjesit të sotëm.

Policia e Essex ka sqaruar se për ngjarjen tragjike është njoftuar nga një telefonatë nga ambulanca e cila lajmëroi se një kamion i mbushur me njerëz qëndronte brenda parkut.

Autoritetet kanë njoftuar se kanë arrestuar shoferin e kamionit, një 24-vjeçar nga Irlanda e Veriut, i cili dyshohet si autor i krimit makabër.

“Është një incident tragjik ku një numër kaq i madh njerëzish kanë humbur jetën. Hetimet vazhdojnë për të kuptuar se çfarë ka ndodhur por identifikimi, do të jetë një proces i gjatë.”, tha shefi i policisë, Andrew Mariner.

Policia tha gjithashtu se kamioni vinte nga Bullgaria dhe kishte hyrë të shtunën në Britani nga porti i Holyhead, në Uells sidoqoftë mbetet ende e paqartë se cilin intinerar ka ndjekur për të mbërritur deri në Britaninë e Madhe.

Kompleksi industrial ku u gjetën trupat është një pikë ndalimi për të gjithë kamionët që shkojnë në jug të Anglisë e më pas kalojnë Kanalin e La Manshit për të përfunduar në Europë.

Autoritetet britanike ishin paralajmëruar vitin e kaluar se emigrantët e paligjshëm po përdornin gjithnjë e më tepër kufirin irlandez për t’u futur në Britaninë e Madhe.

BBC zbuloi vitin e kaluar se si emigrantët nga Azia, por jo vetëm, dërgoheshin me avion në Dublin, më pas transportoheshin për në Londër me dokumente false./Opinion.al

1 2 3 4
<
>

Pas