26-vjeçari, Ajet Qokthi nga fshati Trush i Shkodrës mund të jetë vrarë për grabitje. Kjo është pista kryesore ku po heton policia, ndërsa nuk ka ende asnjë informacion mbi atentatorin e mundshëm.
26-vjeçari udhëtonte me djalin e xhaxhait të tij, në vendin e parë të kamioçinës. Ata përshkonin çdo ditë rrugën nga Trushi i Shkodrës në Torrovicë të Lezhës për të mbledhur qumështin e fshatarëve dhe për ta dërguar nëpër punishte.
“Autorët kanë pasur dijeni për itinerarin e kamionit të qumështit dhe kanë tentuar ta grabisin. Dyshohet se kanë qëlluar në drejtim të tij për ta ndalur. Një grabitje e ngjashme u ka ndodhur kushërinjve edhe 3 vjet më parë”, thonë burimet nga policia.
Gjithsesi policia nuk përjashton edhe pista të tjera hetimi që kanë të bëjnë me konkurrencën, konflikteve ose ndonjë hakmarrje të mundshme. Për të zbardhur marrëdhëniet e kushërinjve Qokthi, policia e Lezhes po bashkëpunon edhe me me policinë e Shkodrës.
