Një sulm ajror me gaz helmues në veriperëndim të Sirisë u ka marrë jetë të paktën 58 civilëve. Ekspertë të OKB-së akuzojnë qeverinë siriane për sulmin.
Sipas Qendrës Vëzhguese Siriane për të Drejtat e Njeriut në mesin e 58 viktimave me gaz helmues në Siri janë edhe 11 fëmijë.
Të paktën 160 të tjerë janë plagosur rëndë, shumë vetë kanë pasur vështirësi me rrugët e frymëmarrjes.
Gazi helmues duket është përdorur në provincën e Idlibit, në qytetin Çan Sheiçun të martën në mëngjes. Idlibi kontrollohet gjerësisht nga aleanca e rebelëve, një degë e Frontit të Al-Kaidas dhe Al-Nusras. Grupi njihet tani me emrin Fateh al-Sham.
Rusia mohon çdo lidhje me sulmin
Sipas të dhënave të Qendrës Vëzhguese Siriane është vështirë të verifikohet, nëse sulmi është kryer nga avionë sirianë apo rusë. Kjo organizatë është e afërt me rebelët dhe bazohet në të dhëna informantësh për publikimet e saj.
Rusia ndërkohë hodhi poshtë kategorikisht të martën çdo lloj përgjegjësie në lidhje me sulmin me gaz helmues në Siri. Ministria e Brendshme në Moskë është shprehur, se aviacioni luftarak rus nuk ka kryer sulme me bomba në rajonin përreth qytetit Çna Sheiçun.
