Një aksident ka ndodhur mbrëmjen e së dielës në zonën e “Pallatit me Shigjeta” në Tiranë, ku një automjet ka përplasur një person me motor. Ngjarja ndodhi si pasojë e mosrespektimit të sinjalistikës rrugore. Gjithashtu drejtuesi i automjetit nuk njoftoi policinë për aksidentin, u largua nga vendi i ngjarjes duke mos i dhënë ndihmë të dëmtuarit.
Forcat e policisë u vunë në ndjekje të drejtuesit, e ndaluan dhe konstatuan se ai ishte në gjendje të dehur në masën 0.83 mg/l.
Për pasojë, A.N. 37-vjeç, u arrestua në kushtet e flagrancës për veprën penale të drejtimit të mjetit në gjendje të dehur si dhe iu pezullua leja e drejtimit për mosdhënie ndihme të të dëmtuarit dhe largim nga vendi i aksidentit.
