Janë publikuar pamjet e arrestimit të 37 vjeçarit Marjan Levanti i cili mbrëmjen e djeshme plagosi nënën, babain dhe vëllain e ish-bashkëshortes. Ngjarja ndodhi tek Unaza e Re, rruga “Teodor Keko”, tek një banesë private. Autori pasi plagosi me thikë familjarët e ish-gruas u fsheh në një pallat në ndërtim, ku u gjet dhe u arrestua nga Policia e Tiranës. Tre të plagosurit Ferit Kocaqi 72 vjeç, Qanie Kocaqi 69 vjeç dhe A. Kocaqi 47 vjeç janë jashtë rrezikut për jetën në spital.
Para oficerëve të policisë gjyqësore ai ka pranuar krimin e plagosjes së trefishtë dhe ka bërë fajtorë prindërit e ish-gruas, duke thënë se ata kishin ndikuar në divorc dhe tani e pengonin të takonte dy fëmijët e tij.
“Ata me ndanë nga gruaja. Kemi qenë të martuar që prej 2008 dhe kemi 2 fëmijë. Për një gabim që kam bërë në 2013 ata me quajnë ‘kriminel’ dhe ‘burgaxhi’. Ia mbushen mendjen Elenës të më braktisë”, ka thënë 37-vjeçari në polici.
37-vjeçari kishte pak muaj që kishte dalë nga burgu ku vuajti dënimin për plagosje të rëndë me dashje të një 18-vjeçari. Ngjarja në fjalë çoi në vrasjen e vëllait të tij.
Precedentët
Marjan Levanti është vëllai i ish -oksierit, Adrian Levanti. Ky i fundit është ekzekutuar me 7 plumba pistolete në 26 prill të 2013. Atentati ndodhi në katin e shtatë të pallatit ku banonte, në zonën e Unazës së Re në Tiranë. Më herët, 18 mars 2013 Marjan Levanti kishte plagosur me thikë komshiun e tij Zef Gj, pas një konflikti për zhurmën në pallat. Vëllai i Zef. Gj u arrestua si i dyshuar për vrasjen Adrian Levanti, vëllai i Marjan Levantit.
