Materniteti i Lezhës është në kushte skandaloze. Jo vetëm që mungojnë aparaturat dhe medikamentet por edhe godina është kaq e amortizuar sa shiu pikon gjithandej në sallën e operacionit dhe atë të lindjeve. Për gjendjen nuk ankohen vetëm pacientët por edhe mjekët, raporton Opinion.al.
Videon më poshtë, që dëshmon se çfarë ndodh sot në këtë maternitet e ka postuar në facebook, mjeku Obstetër Gjinekolog, Leon Kaza që është njëherësh edhe shef i maternitetit në Lezhë. “Ky është rezultati pas 20 vitesh indiferencë ndaj maternitetit Lezhë”, shkruan mjeku.
*Pamjet më poshtë tregojnë se si janë vendosur kovat dhe koshat e plehrave për të mbajtur ujin e shiut që pikon nga tavani…
Kjo nuk është hera e parë që shefi i maternitetit ankohet për kushtet e vështira të punës. Edhe më herët ai ka denoncuar publikisht dhe ka kërkuar ndërhyrje nga Ministria e Shëndetësisë. Madje në një postim të bërë në Dhjetor, ai akuzon për afera korruptive.
Sipas Kazës për repartin e Dializës i janë dhuruar lekët një privati, si dhe një pavion shtetëror. Po kështu akuzon se firma private brenda në spital ka dëmtuar pavionet e tjera. /Riviera Dedaj-Opinion.al
