Ka qenë prag tragjedie incidenti me autobusin sot në Shëngjin. Në orën 06:00 ato ishin nisur si çdo ditë me autobus për në punë. Janë vajza dhe gra, punëtoret e fabrikës së peshkut që udhëtonin nga Lezha në Shëngjin. Rreth orës 06:30 teksa autobusi po kalonte pranë Kënallës (ish-këneta) pak kilometra larg vendit të punës, gurët u shkëputën nga shkëmbi dhe ranë në autobus. Siç duket dhe në pamje, gurët goditën fundin e autobusit ku gjendeshin më pak punëtore se në karriget e para. Nga të dhënat paraprake thuhet se 2 vajza të reja kanë mbetur të plagosura. Ato janë dërguar në spitalin e Lezhës dhe paraprakisht thuhet se janë jashtë rrezikut për jetën.
Njoftimi i policisë për ngjarjen:
Me datë 06.06.2018, rreth orës 06:42, është marrë njoftim se në rrugën Lezhë – Shëngjin, tek vendi i quajtur “Knalla”, një masiv shkëmbor është shkëputur nga mali dhe i ka rënë një autobusi me targa AA 971 JZ, me drejtues shtetasin P.P. i cili po kalonte aty në ato momente.
Për pasojë janë dëmtuar 2 shtetase, K.D. 21 vjeçe banuese në Zejmen e cila është transportuar për në Qendrën e Traumes në Tiranë, dhe shtetasia B.Z. 23 vjeçe banuese në Tresh, e cila ndodhet në spitalin Rajonal Lezhë nën kujdesin e mjekëve, jashtë rrezikut për jetën.
Grupi hetimor në bashkëpunim me Prokurorinë e Rrethit Gjyqësor Lezhë vazhdojnë hetimet në vendngjarje për zbardhjen e plotë të rrethanave të aksidentit.
