Pas arrestimit të ish-kryebashkiakut të Vorës, Agim Kajmaku, ka reaguar nënkryetari i Partisë Demokratike, Edi Paloka.
Përmes një postimi në rrjetin social “Facebook”, Paloka ka publikuar një video ku shfaqen deklaratat e kryeministrit Edi Rama në lidhje me ligjin e dekriminalizimit si dhe deklaratat e tij mbështetëse ndaj Kajmakut.
Në këtë video, shfaqet Rama gjatë fushatës elektorale ku shprehet se “Gimi është si puna ime.” Ndërkohë, krahas videos, Paloka shkruan se të gjithë kriminelët që sipas tij, u emëruan kryebashkiakë dhe deputetë kanë “fytyrën” e Ramës.
“Me gojën e tij: “Gimi është si puna ime…” Tani e kanë kuptuar të gjithë, jo vetëm “Gimi” po gjithë tufa e krimineleve që u emëruan deputete e kryetare bashkie, kanë fytyrën tënde”-shkruan Paloka.
Kajmaku ishte në kërkim që prej muajit nëntor, për emërime të paligjshme, pasi u zbulua se kishte genjyer në formularin e dekriminalizimit. Ish-kryebashkiaku socialist nuk deklaroi dënimin e tij në Greqi kur kandidoi në zgjedhjet vendore të qershorit 2019.
Ai është akuzuar gjithashtu për falsifikim të vulës, falsifikim të dokumenteve zyrtare dhe vazhdim i detyrës pas dorëheqjes.
“Prokuroria e Rrethit Gjyqësor Tirane, ka shpallur në kërkim me masë sigurimi me arrest në burg, në lidhje me hetimin që zhvillohet në ngarkim të shtetasit Agim Kajmaku, i dyshuar për kryerjen e veprave penale, shpërdorim detyre, sipas nenit 248 te Kodit Penal, falsifikimi i formularëve, neni 190 i Kodit Penal, dhe Ushtrimi i funksioneve pas dhënies fund të detyrës, neni 249 i Kodit Penal”, thuhet në urdhër-arrestin për Kajmakun./Opinion.al
