Deputeti demokrat Edi Paloka u pyet nga Iris Luarasi se pse zgjodhi të hedhë bojë mbi Ramën pikërisht sot që në parlament do të votohej protokolli për hyrjen e Maqedonisë së Veriut në NATO.
“Nuk duruat dot deri në seancën e rradhës por në momentin që keni një mik të ftuar bëni show?” pyeti Luarasi.
Paloka u përgjigj se e gjithë kjo ishte “një lojë e Ramës dhe Ruçit”. Ai u shpreh se ata u përpoqën të shfrytëzonin një mik që të zhvillonin një seancë plenare në kushte normale. Pikërisht për këtë e lanë mikun të merrte fjalën i pari, por “nuk mund të pranonim të përdorej seanca sikur gjërat ishin normale”, tha deputeti demokrat.
“Akti im është simbolik, hakmarrjen e bëj ndryshe. Por ishte po Rama që provokoi me gojën e tij të qelbur atë që ndodhi. Isha përgatitur prej një jave, por nuk do ta bëja nëse nuk do më provokonte; nuk do dilte në rracën e tij, në zërin e tij. Nuk mund të lejonim ne të përdorej seanca për fasadë.”/E.L
