Deputeti i PD, Edi Paloka thotë se largimi i Lulzim Bashës nga drejtimi i PD është rruga e vetme për zgjidhjen e krizës në selinë blu. Anëtari i Komisioni të Rithemelimit, i cili e cilëson Bashën të shkarkuar që nga Kuvendi i 11 Dhjetorit dhe referendumi i 18 dDjetorit thotë se nuk ka negociata mes Komisionit dhe Bashës.
“Ndërmjetës midis nesh nuk ka pasur midis Komisionit të Rithemelimit dhe Lulzim Bashës. Ka pasur një kontakt apo takim të zotit Berisha me ish-deputetin Elmar Brok. Mesa di unë me kërkesë të Lulzim Bashës, në fund ka rezultuar që Brok i ka thënë Berishës që mbetesh e vetmja zgjidhje për këtë situatë në PD”.
Sipas Palokës, Basha kërkon që të marrë poste drejtuese para se të jap dorëheqjen nga posti i kryetarit të PD, në mënyrë që të mbetet aktiv në politikë.
“Zoti Basha kërkon të marrë një pozicion qoftë edhe kryetar të një komisioni parlamentar për të qëndruar aktiv në politikë. Përderisa këto janë biseda që unë nuk kam qenë i pranishëm, nuk mund të marr përsipër as t’i konfirmoj, as t’i konsideroj si reale”.
Propozimit të grupit parlamentar që edhe ish-kryeministri Sali Berisha të mos garojë për t’u rizgjedhur në krye të PD, Paloka i përgjigjet duke thënë se kjo çështje zgjidhet nëpërmjet votës së lirë.
“ Në këto kushte është krejt absurde që t’i kërkosh atij që ka fituar, largimin nga politika. Por edhe sikur mos të ishin këto kushte, në një situatë tjetër më normale nuk mund t’i thuash dikujt largohu nga politika pa e hedhur në votë”.
Deputeti demokrat thotë se Komisioni i Rithemelimit vazhdon procesin e riorganizimit të PD duke filluar me përzgjedhjen e drejtuesve të degëve të PD./Klan News
