Tensionet mes opozitës dhe mazhorancës vijojnë të mbeten tema më e diskutuar aktuale. Parlamenti prej kohësh është shndërruar në një kaos dhe shumë larg atij normalit.
Opinion.al ka realizuar një intervistë me deputetin e Partisë Demokratike Edi Paloka, ku ai ka folur rreth planit të opozitës dhe protestave të cilat me sa duket do vijojnë gjatë në Parlament.
Një ndër tema më të diskutuar është edhe ajo e djegies së mandateve nga opozita, gjatë intervistës Paloka nuk e ka përjashtuar si opsion, por ka paralajmëruar se nëse ndodh diçka e tillë do të jemi në prag të një lufte civile.
Intervista e plotë:
- Reagimi i djeshëm i Opozitës vjen pas një proteste paqësore në shesh. Mendoni se reagimet e forta në Parlament kanë më tepër impakt te vetë mazhoranca se marshimi i qindra mijëra njerëzve në shesh?
Unë jam i bindur se një ndërthurjen e të gjitha formave të protestës jo vetëm të opozitës por të të gjithë grupimeve dhe qytetareve që tashmë kanë bindjen së Rama dhe kjo qeveri janë një e keqe që duhet ndalur, janë mënyra e vetme për të sjelle ndryshimin.
- Parashikohen protesta të tjera gjatë seancave parlamentare?
Ne veprojmë aktualisht në një Parlament pa legjitimitet . Megjithatë deri në këto momente kemi një vendim , si opozite, qe te vazhdojmë te veprojmë edhe ne sallën e Parlamentit ne funksion te pikësynimit qe tashme ka shpallur Fronti opozitar; largimin e qeverise Rama dhe formimin e një qeverie antimafia .
- Nëpër media po qarkullon lajmi se mazhoranca përdori fjalor fyes gjatë seancës së djeshme. Si është e vërteta?
Fjalori dhe etika janë problemet e fundit për një maxhorancë dhe një Parlament pa mandat legjitim dhe që vazhdon të dhunojë rregullisht ligjet dhe Kushtetutën e vendit përfshi dhe ato ligje apo rregulla që kanë vendosur vetë edhe pa miratimin tonë.
- Sa afër djegies së mandateve është Partia Demokratike?
Siç është përsëritur me se një here, djegia e mandateve është një nga variantet që është diskutuar dhe vazhdon të mbetet opsion për opozitën. Por duhet të bëj të qartë se një akt i tillë ekstrem, në se ne do të jemi të detyruar ta ndërmarrim, nuk do të jetë aspak lajm i mirë sepse në atë moment vendi do te jete vetëm një hap larg konfliktit, luftë civile./Intervistoi Ema Shazivari©
