Nënkryetari i Partisë Demokratike, Edi Paloka ka ironizuar zgjedhjen e kryeministrit Rama për të prezantuar platformën “Deputeti që duam” nga inceneratori i Elbasanit.
LEXO EDHE: Provokon Rama, “Deputeti që duam” nis nga inceneratori i Elbasanit
Në një dalje për mediat ,Paloka u shpreh se edhe sikur ta kishte paguar PD, Rama nuk do të kishte gjetur simbolikë më të mirë se ajo e sotmja.
“Simbolikë më të gjetur se kjo nuk ka pasur gjatë gjithë historisë së tij dhe sikur ta kishim paguar ne nuk do të bënte një gjë më të gjetur se ajo që bëri sot. Ka vite që Partinë socialiste e ka kthyer jo vetëm në një organizatë kriminale por edhe në një kosh plehrash. Pasi ka përzënë nga PS të gjithë figurat intelektuale dhe të ndershme e dimë të gjithë që ka mbledhur kriminel të të gjithë llojeve. E thashë që simbolikë më të gjetur si kjo e sotmja, që të prezantonte të ardhmen e Rilindjes në një vend grumbullimi plehrash, Rama nuk mund të kishte.”, tha Paloka.
Më tej, numri dy i demokratëve tha se dalja e sotme e kryeministrit Rama para inceneratorit të Elbasanit, kishte si qëllim t’i përconte një mesazh drejtësisë për të mos hetuar kontratat e tyre.
“Qëllimi është që t’i thotë drejtësisë mos guxoni të merreni me këtë çështje sepse inceneratorët janë të mitë dhe po u morët problemet do të jenë tuajat.”, shtoi Paloka.
Kujtojmë se PD, ka kallëzuar në SPAK kryeministrin Rama, ministrin Ahmetaj, kryebashkiakun e Tiranës, Erion Veliaj dhe një sërë zyrtarësh të tjerë për kontratat e koncesioneve të inceneratorëve të cilat i cilësojnë si korruptive./ Opinion.al
