I dërguari i posaçëm i Departamentit të Shtetit për Ballkanin, Matthew Palmer u shpreh se ishte i zhgënjyer me Bashkimin Europian që nuk arriti konsensus për të hapur negociatat me Shqipërinë dhe Maqedoninë e Veriut.
Në një seancë në Komisionin për Marrëdhëniet me Jashtë të Senatit amerikan, Palmer tha se ky vendim mund të ketë pasoja se i dërgohet një mesazh Kosovës dhe Serbisë se edhe nëse marrin vendime të vështira dhe bëjnë përpjekje të mëdha, mund të mos u hapet rruga për bisedime.
Ai bëri thirrje për nisjen e dialogut mes Kosovës dhe Serbisë, duke iu bërë thirrje të dyja vendeve të tërhiqen nga pozicionet antagoniste aktuale. Ai i bëri thirrje Kosovës të heqë tarifat dhe Serbisë që të ndalë fushatën për deligjitimimin e shtetit të Kosovës.
Palmer nuk iu përgjigj drejtpërdrejt një pyetjeje nëse ndryshimi i kufijve është një opsion për arritjen e një marrëveshjeje. Zgjedhjet e fundit në Kosovë, tha zoti Palmer, treguan se populli i Kosovës është i interesuar për përmirësimin e kushteve të brendshme dhe trajtimin e çështjeve si korrupsioni dhe punësimi. /Opinion.al
