Që në orët e para të mëngjesit, një pallat në Bulqizë është rrethuar me shirit nga Policia për shkak të dëmtimeve të pësuar nga tërmeti i së dielës.
Në këtë pallat jetojnë 45 persona, disa nga të cilat kanë dalë me qera në banesa të tjera ndërsa tre të tjerë nuk janë dakord për të dalë.
Njëri prej tyre shprehet se do të kundërshtojë daljen nga shtëpia edhe pse Bashkia ju paguan bonusin e qerasë. Ai thotë se i kanë premtuar më parë se do të bëjnë pallat të ri, por në fakt nuk e kanë bërë.
“Pallati kishte 3 vite që ishte plasur para tërmetit të 2019. Ra edhe tërmeti tjetër para 3-4 ditësh, s’ka asnjë shenjë lëvizje. Unë do rri në shtëpinë time. Ra tërmeti dhe nuk kam dalë nga shtëpia fare. S’është dëmtuar nga tërmeti por nga toka që ka rrëshqit. Unë nuk dal, kam pronën time, mund ta hedhim në gjykatë. Nuk kam ku të shkoj, të rri jashtë. Jemi 2 pleq vetëm. Dje e kemi marrë vendimin për të dalë nga pallati. Kur ra tërmeti i 2019 na thanë që do bëjnë pallat tjetër, kjo nuk u bë. Për 3 vjet ishin bërë 5 pallate. Unë nuk ndjej rrezik, sa më dhimbset jeta ime s’më dhimbset e dikujt tjetër”, tha banori.
Ndërsa një tjetër tha se do të dalë nga banesa se jeton me frikë.
“Dolëm në pallate të tjera por janë të shkatërruara dhe dimri nuk kalohet ndaj u kthyem sërish këtu se do kalojë. Ka ardhur koha vërtetë të dalim sepse jetojmë me frikë këtu. Bashkia ka premtuar që do na japë bonusin e qerasë”, tha banorja.
