Pas debatit të djeshëm në lagjen “Besëlidhja” në Lezhë, Ministri i Brendshëm Sandër Lleshaj është rikthyer sërish në pallatin 12 katësh.
Mbrëmjen e djeshme Ministri Lleshaj pati një debat me shefin e urbanistikës së Lezhës, i cili u shfaq gjerësisht në media për shkak të toneve të larta që përdori ministri ndaj inxhinierit lidhur me sigurinë e një pallati.
Sot Lleshaj ka deklaruar se pallatit i janë bërë dy inspektime dhe se ai konsiderohet si sigurt për të jetuar dhe ka ftuar qytetarët të futen në shtëpitë e tyre.
Kam ardhur për të parë edhe njëherë shqetësimet që kanë ngritur banorët e këtij pallati. Po ta shkurtoja gjithë përkufizimin e kësaj situate, kësaj i thonë shumë zhurmë për asgjë. Në harkun e 24 orëve janë bërë dy ekspertiza, një nga ekspertë shqiptarë dhe një nga ekspertë izraelitë dhe konkluzioni është i njëjtë, – pallati nuk ka asnjë problem me sigurinë e tij.
“E gjithë zhurma e ngritur është një “shumë zhurmë, për asgjë”, e me këtë rast dua t’i ftoj të gjithë banorët e pallatit që të kthehen në shtëpitë e tyre, t’i kthehen jetës normale dhe të na lënë mundësi të merremi me problemet e shumta që ka në vendet e tjera. Problemet nuk janë në këtë pallat. Probleme ka shumë, tërmeti ka krijuar shumë probleme, por jo këtu. Problemet janë gjetiu, janë në Laç, janë në Durrës, janë në Thumanë e të tjera. Këtu njerëzit duhet të kthehen në jetën e tyre të përditshme, sepse nuk ka asgjë për t’u shënuar dhe asgjë për t’u shqetësuar. Nuk ka asnjë problem me sigurinë e këtij pallati të certifikuar dy herë brenda 24 orëve, dhe banorët duhet të kthehen në shtëpitë e tyre. Dhe ju lutem të gjithë atyre që po e përdorin këtë kohë për të bërë zhurmë, të mos bëjnë zhurmë kot.
ekspertë nga gjithë bota, për të na ndihmuar, lus të gjithë ata që kanë mundësi të ndihmojnë,- të ndihmojnë, – dhe lus të gjithë ata që nuk kanë ndërmend të ndihmojnë, – të paktën të heshtin dhe të mos përhapin, as panik, as të mos ngatërrojnë. Kjo është ajo që kërkohet. Ose të ndihmojnë, ose të tërhiqen dhe të mos ngatërrojnë njerëzit. Vëllezër e motra, të gjithëve ju ftoj edhe njëherë: – kthehuni në shtëpitë tuaja, pallati është i qëndrueshëm, i konfirmuar dy herë, nga dy palë ekspertësh, shqiptarë dhe izraelitë! Ju ftoj të ktheheni në shtëpitë tuaja dhe mbyllni veshët për çdo njeri që përhap lajme të pavërteta dhe të pasakta. Ju faleminderit!”, tha Lleshaj.
Megjithatë pas fjalës së tij atij i është kërkuar dokumenti me dy vula i inspektimit për pallatin në fjalë. Kjo ka sjellë një debat tjetër mes tij dhe ish-deputetes Lindita Metaliaj të cilës ai gjatë debatit I drejtohet duke i thënë “shko edhe gjej punën”.
DEBATI ME ISH-DEPUTETEN
Nje banor i pallatit: Duam të shohim dokumentin me firmë
Lleshaj: Jo nuk kam
Lindita Metaliaj: Zoti ministër, në këtë pallat banojnë 140 familje. E duam një shkresë, me firmë dhe vulë. Ekspertët nuk i kishin të gjitha pajisjet. Si mundet vetëm me fjalë. Kush janë ekspertët zoti ministër?
Lleshaj: Po lërë mo ti…Do ti biem tek ti? Do t’i certifikosh ti?
Lindita Metaliaj: Ju nuk i certifikoni dot, ju nuk jeni ekspert zoti ministër. Dhe në radhë të parë ju duhet t’i kërkoni falje popullit të Lezhës për fyerjen dhe arrogancën që i bëtë dje.
Lleshaj: A për këtë ke ardhur ti?
Lindita Metaliaj: Jo jo, unë jam banore këtu, jam në mbështetje të qytetarëve.
Lleshaj: Kush jeni ju?
Lindita Metaliaj: Unë jam Lindita Metaliaj dhe kam ardhur në mbështetje të qytetarëve.
Lleshaj: Ku banoni ju?
Lindita Metaliaj: Banoj në lagjen “Besëlidhja” dhe jam këtu për të mbështetur qytetarët.
Lleshaj: Edhe ke ardhur këtu?! Shko edhe gjej punën.
Lindita Metaliaj: Të lutem, nuk ma tregoni ju punën mua. Ju gjeni punën ku e keni.
Qytetari: Zoti ministër, veç me çekiç nuk certifikohet pallati.
Lindita Metaliaj: Dhe turp të keni për arrogancën. /Opinion.al
