Pamjet më poshtë vijnë nga një zonë në Gaza, e cila u godit nga një sulm ajror nga izraelitët gjatë ditës së sotme.
Në mes të katastrofës së shkaktuar, shtetasi palestinez me kombësi shqiptare, Abdalla Jaber ka raportuar nga zona e sulmit.
Gjatë raportimit ai thotë se ndodhet në Izrael prej një muaji për një vizitë shëndetësore, por situata e tensionuar e ka bllokuar në Gaza.
“Izraeli po godet në çdo vend, civilë, fëmijë, shkolla. Gjendja është tmerr”, raporton Jaber.
Ai thekson se duhej të largohej për në Shqipëri ditën e nesërme, por ende nuk ka marrë një konfirmim se çfarë do bëhet.
“Punoj në Shqipëri dhe kam një muaj në Izrael për një vizitë shëndetësore të nënës, ditën e nesërme duhet të kthehem në Shqipëri por nuk e di çfarë do bëhet. Në këto momente jemi duke pritur një të vdekur që e kanë nxjerrë nga një sulm që ka ndodhur”, shprehet ai.
Në momentet që raporton, Jaber bën me dije se ai bashkë me një grup njerëzish ishin duke pritur një të vdekur që e kanë nxjerrë nga rrënojat, që sipas tij është vetëm një fëmijë.
Sic shihet edhe nga pamjet viktima transportohet nga një grup të rinjsh për në familjen e tij.
Ndër të tjera, Jaber tregon se sulmet janë kryer nga avionat F16. Ai thekson se numri i të vdekurve është goxha i lartë dhe se autoritetet vazhdojnë kërkimet për personat e humbur./Opinion.al
