Kryeministri Edi Rama ka zhvilluar sot një takim me studentë dhe pedagogë, ku ka thënë se rekrutimet e studentëve ekselentë në administratë do të vijojnë në mënyrë periodike. Ai është shprehur se studentët ekselentë do të hyjnë në punë pa konkurs.
“Është krijuar mundësia për futjen e drejtpërdrejtë të studentëve më të mirë në administratë. Sot vendet e punës në shtet janë vende në dispozicion janë të atyre që kanë mbarur universitetin me nota 9-10. Kjo krijon kushtin që çdo kush që ka mbaruar me këtë rezultat të këtë mundësi zgjedhje dhe të hyjë në administratën publike pa konkurs. Do të vazhdojë ky proces, duke rihapur thirrjet për aplikime dhe është bërë një thirrje e re së fundmi dhe një tjetër do të bëhet në gusht. Me kalimin e viteve, këta njerëz fitojnë eksperiencën dhe do jenë aty për shkak të meritës së tyre”, tha Rama.
Kryeministri pohoi se “Programi Kombëtar i Punësimit të Studentëve” iu jep mundësi që të prekin nga afër një praktikë pune, ndërsa shtoi se kjo strategji do të reflektojë në përthithje dijesh dhe kualifikim të lartë./Opinion.al
