Pak orë para protestë së opozitës, kryeministri Edi Rama ka vijuar akuzat për përfshirjen e PD në fondet ruse.
Nëpërmjet një postimi në rrjetet sociale, Rama ka postuar një foto nga takimi që ka bërë Sali Berisha më 17 dhjetor 2010 në Tiranë, në atë kohë kryeministër me Kryetarin e Komisionit të Jashtëm të Dumës shtetërore ruse, Konstantin Kosachev.
Në njërën nga foto shihet dhe qëndrimi i Kosachev lidhur me akuzat ndaj UÇK për trafikim të organeve njerëzore.
Takimi është bërë para votimit në Strasburg të Rezolutës së Këshillit të Evropës për raportin e Dick Marty-t, dhe sipas Ramës ai ka shërbyer që Berisha të mbështeste Rusinë dhe jo UÇK.
“Një muaj përpara bashkimit të duarve për t’i ngulur thikën pas shpine Kosovës dhe Shqipërisë në Strasburg, Çorba e Rublave është gatuar në Tiranë gjatë një vizite të përfaqësuesit të Putinit, e vlerësuar “shumë e rëndësishme” nga zyra e vulëhumburit tanimë të damkosur: NonGrata!”
