Pas ministrit të Brendshëm, Saimir Tahiri në komisionin hetimor për pajisjen përgjuese “IMSI Catcher” u thirr si dëshmitar, drejtori i Përgjithshëm i Policisë së Shtetit, Haki Çako. Edhe z.Çako njësoj si Tahiri refuzoi ti përgjigjet të gjitha pyetjeve që iu drejtuan nga anëtarët e djathtë të komisionit hetimor. “Kjo çështje është në hetim dhe çdo fakt përbën sekret hetimor”, ishte përgjigja standarde e Çakos. Ai iu përgjigj vetëm pyetjes personale, kur Asllan Dogjani e pyeti nëse jeni duke u hetuar. “Nuk jam nën akuzë”, tha Çako.
Pjesë nga debati
Noka: A e keni dijeni për hyrjen e ligjshme të pajisjes?
Çako: I nderuar kryetar të sqaroj raportin tim, respektoj ligjin.
Noka: Ke dijeni se a ka hyrë apo jo? Kjo përgjigje s’ka lidhje me Kushtetutën? Po sillesh sipas porosive të ministrit tënd që sot erdhi kokëulur.
Çako: Ka një procedim penal nga prokuroria e Tiranës, çdo nxjerrje e sekretit në bazë të ligjit për mua bën shkelje të ligjit, unë nuk cënoj ligjin.
Keltis Kruja: Çfarë ka sekuestruar prokuroria?
Çako: Përgjigjen mund ta japë prokuroria, jo unë.
Kruja: Ju ca keni pasur në inventar
Çako: Është në hetim, s’mund tju them.
Kruja: Po silleni si boss-ët e mafias
Dogjani: Kuvendi e ka ditur kur ka ngritur komisionin hetimor se çështja po hetohet në prokurori. Dëshmitari që vjen është i detyruar të përgjigjet. Mund të thoni “po e di” ose “jo nuk e di” nuk mund të thoni është sekret hetimor për gjithçka. Nuk është sekret hetimor nëse kjo pajisje ka ardhur për trajnim.
/Opinion.al
