TIRANE- Partia Demokratike dhe ajo Socialiste shkëmbyen në distancë akuza lidhur me kallëzimin e bërë nga Kontrolli i Lartë i Shtetit për Ministrin e Energjetikës, Damian Gjiknuri për çështjen e CEZ-it. Partia Demokratike akuzoi Kryeministrin Rama se po tenton të mbyllë hetimin lidhur me çështjen e CEZ. Në një dalje për mediat n/kryetari Edmond Spaho tha se opozita është e vendosur për ta çuar deri në fund zbardhjen e aferës së CEZ-it dhe vënien e përgjegjësve përpara ligjit. Në kundërpërgjigje Partia Socialiste i cilësoi të pabaza pretendimet e ngritura nga Kontrolli i lartë i Shtetit. “Jane kursyer 802 milion euro”, tha Ervin Bushati. “Nuk ka asnjë dëm ekonomik dhe pretendimi i KLSH është i pabazë”, shtoi ai. Të mërkurën Kontrolli i Lartë i Shtetit kallëzoi ministrin e Energjetikës Damian Gjiknuri dhe Avokaten e Shtetit Alma Hiçka.
