Kryetarja në detyrë e Gjykatës Kushtetuese, Vitore Tusha është paraqitur sot në Prokurorinë e Tiranës ku është pyetur në lidhje me kallëzimin e Presidentit Meta ndaj kreut të KED-së, Ardian Dvorani.
Tusha është gjithashtu zëvendëskryetare e Këshillit të Emërimeve në Drejtësi. Nën këtë status ajo është marrë në pyetje nga prokuroria për të dhënë sqarime mbi mbledhjet e zhvilluara.
Presidenti i Republikës Ilir Meta ka paditur kreun e KED-së Ardian Dvorani për ‘shpërdorim detyre’ dhe ‘përvetësim të kompetencave’ në rastin e emërimeve për Gjykatën Kushtetuese. Sipas Metës, Dvorani ka synuar manipulimin e procesit të zgjedhjes së anëtarëve të Gjykatës Kushtetuese përmes mungesës së transparencës në KED.
Mësohet se Prokuroria do të sekuestrojë procesverbalet e mbledhjeve të KED dhe regjistrimet audio të mbledhjeve të këtij institucioni. Këto të fundit kanë shërbyer si objekt akuze nga ana e Presidentit, i cili ka akuzuar kreun e KED se në kundërshtim me ligjin nuk i ka publikuar në faqen zyrtare.
Prokurori Alket Mersinaj që ka në dorë çështjen ka marrë deri tani sqarimet e Presidentit Meta, kreut të KED Ardian Dvorani, Avokatit të Popullit Erinda Ballanca. Në ditët në vijim pritet që në Prokurori të paraqiten të gjithë anëtarët e KED të cilëve iu është bërë thirrja. /Opinion.al
