Pablo Daniel Osvaldo ka ndryshuar profesion. Pasi fitoi Scudetton me Juven dy vite më parë, sulmuesi argjentinas që ka shënuar mbi 100 gola në karrierën e tij ka vendosur të largohet nga bota e futbollit për t’iu përkushtuar profesionit të tij të ri, muzikës. Ekipi i fundit që e kishte kërkuar ishte Chievo, duke i ofruar një kontratë dyvjeçare me 2.5 milionë euro ose një kontratë njëvjeçare me pagë 1.5 milionë euro. Në ditën e fundit të merkatos kishte shumë ekipe që u interesuan për lojtarin, por vetëm Chievo e bëri zyrtare ofertën.
Osvaldo nuk u bind nga Chievo, i cili më pas deklaroi se kërkonte të largohej nga futbolli. Tashmë bomberi do të nisë një jetë të re si muzikant bashkë me grupin e tij. Në Itali, ai ka veshur fanellën e Atalanta, Lecce, Fiorentina, Bologna, Roma, Juventus dhe Inter. Eksperiencën e fundit e kishte në Argjentinë me Boca Juniors. Një aventurë e cila përfundoi keq. I njohur për sjelljen e tij të ekzagjeruar, Osvaldo gjithmonë ka qenë një ‘rock star’ jashtë fushe.
