OSHEE ka reaguar ndaj akuzave të Partisë Demokratike, lidhur me nje tender, që sipas opozitës e ka fituar djali i deputetes Valentina Leskaj, i dyti brenda pak ditësh, pas konccensionit të hekurudhës.
Bëhet fjalë për tenderin për trajtimin e stresit të punonjësve të OSHEE-se. Në një deklaratë, ky institucion ka thënë se bëhet fjalë për një procedurë të anuluar, duke njoftuar se brenda kësaj jave do të rihapë sërish procedurën e prokurimit për këtë shërbim.
Në njoftimin e OSHEE, akuzat e opozitës konsiderohen baltosje mbi punën e bërë nga qeveria dhe OSHEE. “Kaq shumë janë të etur për të hedhur baltë, sa janë të gatshëm të gënjejnë vetëm e vetëm se nuk pranojnë dot faktin se në 2 vjet qeveria e re dhe OSHEE ka bërë shumë më shumë se çbëri qeveria e tyre në tetë vjet së bashku”.
Referuar procedurës në fjalë, OSHEE sqaron se, më datë 29 tetor, ka njoftuar me shkresë dhe protokoll (bashkëlidhur) Agjencia e Prokurimit Publik (APP) si dhe janë bërë veprimet në sistemin elektronik për anullimin e procedurës, për shkak se kompania nuk realizonte në kohë shërbimin e kërkuar.
“Në lidhje me projektin theksoj se Kjo praktikë është e njohur dhe ndërkombëtare. Në lidhje me “Menaxhimin e Stresit”, është 1 ndër 20 temat e planifikuara për trajnime, dhe bëhet fjalë vetëm dy ditë trajnim dhe që përfshin specialist të Kujdesit ndaj Klientit për të rritur cilësinë e shërbimit publik ndaj qytetarit”- thuhet ne deklaratën e OSHEE.
