Presidentja e Kosovës Vjosa Osmani dhe Kryeparlamentari Glauk Konjufca, kanë bërë homazhe te Memoriali për të Pagjeturit, në Ditën Ndërkombëtare të të Zhdukurve.
Gjatë fjalës së saj në një dalje për media, Osmani tha se shteti serb nuk po e zbaton marrëveshjen e arritur në Bruksel për hapje të arkivave.
Ajo thekson se të zhdukurit me dhunë janë plaga dhe dhimbja më e madhe e Kosovës.
“Të zhdukurit me dhunë janë plaga dhe dhimbja më e madhe e vendit tonë. Në fillim të këtij viti u arrit një marrëveshje në Bruksel për t’i hapur Serbia arkivat për të zhdukurit, dhe përkundër kërkesës sonë që të bëhet në fillim të qershorit, një kërkesë në drejtim të presidentit Vuçiç, fatkeqësisht Serbia vazhdon ta shkelë marrëveshjen”, u shpreh Osmani.
Ndër të tjera, ajo ka kërkuar që bashkësia ndërkombëtare të shtojë trysninë ndaj Serbisë që t’i dorëzojë të zhdukurit me dhunë.
“I bëj thirrje komunitetit ndërkombëtar dhe miqve aleatë që të mendojnë për prindërit dhe familjarët që ende të zhdukurit i kanë në varrezat e Serbisë. Të mendojnë për nënën që e ka varrin e zbrazët, të mendojnë për fëmijët që ende nuk e dinë ku e kanë babanë, që Serbia t’i dorëzojë të pagjeturit”, u shpreh ajo./Opinion.al
