Osmani pret Dendias, flasin për dialogun Kosovë-Serbi

Presidentja e Kosovës, Vjosa Osmani ka pritur sot në takim ministrin e Jashtëm të Greqisë, Nikos Dendias. Në një njoftim për mediat, zyra e shtypit të presidencës bën me dije se Osmani ka vlerësuar angazhimin e Greqisë në rajon si dhe mbështetjen e vazhdueshme për integrimin e rajonit në Bashkimin Evropian.
“Në këtë frymë, Presidentja Osmani, duke u thirrur në vlerat e përbashkëta euroatlantike, ka kërkuar që mbështetja greke për anëtarësimin e Kosovës në institucionet euroatlantike të vazhdojë. Ndër të tjera, Presidentja Osmani ka theksuar se integrimi i plotë ndërkombëtar i Kosovës, përfshirë Bashkimin Evropian, NATO-n dhe Këshillin e Evropës, do t’i kontribuonte paqes së qëndrueshme në rajon.”, thuhet në njoftim. Osmani ka shprehur gjithashtu falenderime për mbështetjen e Greqisë për liberalizimin e vizave.
Osmani dhe Denias kanë diskutuar gjithashtu edhe për planin e zbatimit të marrëveshjes me Serbinë, e cila do të luajë një rol të rëndësishëm për paqen dhe stabilitetin afatgjatë në rajon.
“Në lidhje me zhvillimet e fundit në procesin e dialogut me Serbinë, Presidentja Osmani ka theksuar se plani i zbatimit të marrëveshjes duhet të jetë në përputhje me Kushtetutën e Republikës, e cila do t’i kontribuojë paqes dhe stabilitetit afatgjatë në rajon, gjersa ka ritheksuar se koordinimi i Kosovës me aleatë në këtë proces do të vazhdojë”, thuhet në njoftim.
Në takimin me Dendias Osmani ka diskutuar edhe për forcimin e bashkëpunimit dypalësh mes Kosovës dhe Greqisë.
“Në takim është diskutuar edhe për raportet Kosovë-Greqi, me ç’rast Presidentja Osmani ka shprehur gatishmërinë e thellimit të mëtutjeshëm të marrëdhënieve dyanëshe, duke përmendur nevojën e rritjes së shkëmbimit tregtar e ekonomik, si dhe bashkëpunimit në sfera të ndryshme të interesit të përbashkët.”, thuhet më tej në njoftim./Opinion.al