Prezenca e OSBE në Shqipëri ka njoftuar se ka nënshkruar një marrëveshje bashkëpunimi me Prokurorinë e Tiranës dhe Policinë e shtetit.
Në njoftimin e OSBE thuhet se synimi i kësaj marrëveshjeje është “realizimi i një analize sistemi sa i përket punës së përbashkët, bashkërendimit të veprimtarive dhe shkëmbimit të informacionit mes Policisë Gjyqësore dhe Prokurorëve gjatë kryerjes së procedimeve penale”.
Kjo analizë e sistemit nga ana e OSBE do të synojë që në fund të japë një sërë rekomandimesh për të ndihmuar dy organet ligjzbatuese në intensifikimin e bashkëpunimit për hetimin e çështjeve penale, veçanërisht atyre të lidhura me korrupsionin dhe krimin e organizuar.
“Shqyrtimi gjyqësor përbën thelbin e drejtësisë, por është një mekanizëm po aq i efektshëm sa edhe procedimet që e fillojnë atë; në rastin e të drejtës penale bashkëpunimi mes prokurorisë dhe policisë gjyqësore përbën themelin e suksesit të tij” thuhet në marrëveshje.
OSBE ka njoftuar gjithashtu se do të nënshkuajë marrëveshje edhe me pesë Prokurori të tjera rrethesh në Durrës, Elbasan, Shkodër, Vlorë, Fier, si dhe me Drejtoritë Rajonale të Policisë së Shtetit për secilin qark. /Opinion.al
Prezenca e OSBE-së në Shqipëri punon së bashku me Prokurorinë dhe Policinë e Shtetit për intensifikimin e bashkëpunimit mes Policisë Gjyqësore dhe prokurorëve. Për më tepër lexoni në faqen e internetit të Prezencës: https://t.co/pJ421f816f pic.twitter.com/DX1kj39wv1
— OSCE PresenceAlbania (@OSCEinAlbania) June 25, 2019
