Kriza politike në Shqipëri ka bërë jehonë tek të gjithë shqiptarët që jetojnë nëpër botë. Për vetë natyrën e paprecedentë që ka marrë, zgjidhja e saj shihet shumë e vështirë por një gjë për të cilën bien dakort të gjithë është se hapi i parë mbetet dialogu.
Pikërisht thirrjes për dialog i është bashkuar sot edhe organizata shqiptaro-amerikane VATRA. Ata nxisin palët politike që të ulen për të gjetur një zgjidhje afatgjatë pasi vendit po i rrezikohen standardet demokratike dhe stabiliteti social.
Me anë të një deklarate, Federata Panshqiptare e Amerikës ka shprehur shqetësimin e saj për situatën që e konsideron ‘të paprecedente’ në Shqipëri. Aty thuhet se është e dhimbshme që edhe pas tri dekadash pluralizëm vendi ka akoma probleme të thella lidhur me zgjedhjet dhe shton se ndërhyrja në këtë proces është tërësisht e dënueshme.
“Konflikti civil, i cili po hedh shtat dita-ditës nuk duhet lejuar dhe qeveria ka përgjegjësinë kryesore të gjejë rrugët për shuarjen e tij. Ashpërsimi i mosmarrëveshjeve politike shoqërohet fatkeqësisht me ndasi të mëdha shoqërore, gjë e cila dëmton objektivat evropiane të vendit”, thuhet në deklaratë.
VATRA nxit palët të ulen në një dialog serioz konstruktiv, përmes të cilit të prodhohet një zgjidhje e cila të parandalojë krijimin e situatave të ngjajshme në të ardhmen. Njëkohësisht ajo shpreh keqardhjen për humbjen e kohës, nga e cila sipas saj, humbet Shqipëria dhe populli. /Opinion.al
