Organizata Botërore e Shëndetësisë deklaroi se përhapja e koronavirusit Covid-19 “mund të karakterizohet si pandemi”.
“Jemi thellësisht të shqetësuar për nivelin alarmant të përhapjes dhe ashpërsisë”, tha drejtori i përgjithshëm i OBSH, Tedros Adhanom Ghebreyesus.
“Përshkrimi i situatës si pandemi nuk e ndryshon mënyrën se si vlerësohet kërcënimi i këtij koronavirusi. Nuk do të ndryshojë ajo që ne po bëjmë. U kemi bërë thirrje njerëzve që të marrin masa urgjente dhe agresive që nga dita e parë. I kemi rënë kambanës së alarmit fort dhe qartë”, shtoi ai.
Gjatë konferencës për mediat, Ghebreyesus tha gjithashtu se agjencia që ai drejton “është thellësisht e shqetësuar edhe për nivelin e mosveprimit në nivel botëror”.
“Nuk mund ta themi më fort, më qartë dhe më shpesh sa kaq: të gjithë shtetet mund ta ndryshojnë drejtimin e kësaj pandemie”, tha ai.
Pandemitë, siç kanë shpjeguar ekspertët, nuk flasin për ashpërsinë e një sëmundjeje, por vetëm për shtrirjen e saj gjeografike.
Kriteret specifike për një pandemi nuk janë përcaktuar botërisht, por ka 3 kritere të përgjithshme:
1. Një virus që mund të shkaktojë sëmundje ose vdekje.
2. Një virus që përcillet nga kontakti mes njerëzve.
3. Një virus që përhapet në të gjithë botën.
Në të gjithë botën nga koronavirusi janë infektuar 121,061 persona, nga të cilët 4,368 kanë vdekur, ndërkohë që rreth 66,000 janë shëruar./Opinion.al
