Kryeministri hungarez Viktor Orban i është rikthyer retorikës anti-BE. Tonet e tij u ashpërsuan më tepër pas përjashtimit nga e djathta euro-parlamentare.
Në një intervistë radiofonike, Orban është shprehur se BE është kundër qeverisë së tij pasi ka ekspozuar aferat që kanë ndodhur në Bruksel.
Ai shprehet se qeveria e tij mund të nis fushata mediatike kundër BE, gjë e cila mund të ketë ndikim dhe në zgjedhjet e ardhshme euro-parlamentare.
Të mërkurën, grupi kryesor i së djathtës në PE, Partia Popullore Europiane votoi për pezullimin e partisë së Orban për shkak të shqetësimit se ekzekutivi i tij kishte shkelur parimet e shtetit ligjor.
Më herët, Orban ka sulmuar hapur presidentin e Komisionit Europian, Zhan Klodi Juncker, duke e cilësuar atë si një person që përdoret për interesat e miliarderit amerikan me origjinë hungareze Xhorxh Soros.
Pas këtyre sulmeve kryeministri i Hungarisë i kërkoi falje anëtarëve të PPE-së, por nuk kaloi shumë kohë që Orban t’u rikthehej akuzave në drejtim të BE dhe drejtuesve të saj.
Përveç situatave politike, Orban është përplasur me BE dhe për çështjen e emigracionit si dhe për reformën e sistemit gjyqësor
“Njerëzit në Bruksel janë paksa të acaruar me ne sepse ne ndërmorëm një fushatë informative këtu në Hungari, duke ekspozuar atë që po bënte Brukseli. Ne i ekspozuam dhe është normale që ata të jenë të inatosur.
Detyra jonë është të vazhdojmë të informojmë njerëzit për atë që bën Brukseli dhe nuk duhet të trembemi nga disa masa që kundërshtari ynë mund të marrë ndaj nesh”, ka thënë Orban./ Opinion.al E.Xh.
