Turqia ka nisur sulme ajrore ndaj objektivave kurdë në Irak dhe Siri, një javë pas një bombardimi në Stamboll për të cilin fajëson militantët kurdë.
Sulmet goditën bazat kurde që po përdoreshin për të nisur sulmet ndaj Turqisë, tha ministria e mbrojtjes.
Një zëdhënës siriano-kurd tha se dy fshatra të populluar me njerëz të zhvendosur brenda vendit u goditën.
Grupi i ndaluar kurd PKK mohon kryerjen e sulmit në Stamboll.
Me fillimin e sulmeve ajrore, ministria turke e mbrojtjes shkroi në Tëitter se “ora e llogarisë” kishte mbërritur, së bashku me një foto të një avioni luftarak që ngrihej dhe pamjet e një shpërthimi.
“Strehërat, bunkerët, shpellat, tunelet dhe magazinat e terroristëve u shkatërruan me sukses”, tha ministri turk i Mbrojtjes Hulusi Akar. Ministria turke e mbrojtjes tha më vonë se sulmet ndaj bazave militante kurde në Sirinë veriore dhe Irakun verior shkatërruan 89 objektiva.
Forcat e udhëhequra nga kurdët në Siri u zotuan të hakmerren dhe thanë se qyteti i Kobane u godit si dhe dy fshatra me popullsi të dendur.
Të paktën 31 persona u vranë vetëm në Sirinë veriore, sipas Observatorit Sirian për të Drejtat e Njeriut me qendër në Mbretërinë e Bashkuar.
Nuk është e qartë se cilat objektiva u goditën në Irak./Opinion.al
