Mbledhja e sotme e Komisionit të Sigurisë ku ishte thirrur për të raportuar zv/drejtori i Policisë së Shtetit, Altin Qato ëshët kthyer në një arenë të ashpër debatesh politike.
Akuzat më të mëdha i artikuloi Flamur Noka i cili deklaroi se në kupolën e policisë janë kthyer njerëz të inkriminuar.
“Në polici janë rikthyer zyrtare që u përjashtuan si të inkriminuar nga SHBA-të. Sot policia nuk ka besimin e qytetarëve dhe partnerëve ndërkombëtarë”, u shpreh Noka.
Më tej deputeti demokrat tha: “Të gjithë e dinë se kupola e policisë ka qenë e përfshirë në kultivimin e drogës. Këtë e thonë edhe raportet e ndërkombëtarëve, u shpreh Noka.
“Vettingun që doni ta nisni në polici niseni nga ministri i Brendshëm dhe kryeministri”.
Kryetarja socialiste e komisionit të Sigurisë, Ermonela Felaj tha se nuk mund të flitet pa fakte. “Duhet të ballafaqohemi me të dhëna konkrete”, iu drejtua Felaj Flamur Nokës.
Pjesë nga debati
Flamur Noka: Një Shqipëri që është vend transit i drogave të forta, nuk mund të ketë polici të besueshme. Nëse do vazhdoni ta mbani policinë në lidhje me krimin, do ta degradoni dhe kalbeni. Në 4 vitet që shkuan nuk u fol gjë tjetër vetëm për drogën.
Ato që thashë nuk bazohen në hamendje. Deklaratat e prokurorisë dhe informacionet e shërbimit sekret flasin për përfshirjen e zyrtarëve të policisë së shtetit janë të lidhur me drogën. Partnerët ndërkombëtarë sidomos ata amerikane e kanë evidentuar këtë.
Deputeti i LSI Endrit Brahimllari ka ngritur pyetjen se çfarë masash po merren nga policia për dhunën në familje.
Ndërsa Qato ka deklaruar se “po analizojmë rastet dhe po studiojmë ndërhyrjen. Nuk mjafton policia. Duhet dhe partneritet mes aktoreve të tjerë”.
Deputeti i djathtë Ervin Salianji ka kërkuar informacion nëse është zbardhur ndonjë grup i strukturuar kriminal.
Pas këtyre debateve të bëra, komisioni është ndërprerë për të nisur sërish në orën 12:00.
/Opinion.al
