Opozita e bashkuar ka lajmëruar sot protestën e nëntë kombëtare kundër qeverisë. Protestuesit pritet të mblidhen në sheshin përpara kryeministrisë në orën 20:00. Gjatë protestave të shkuara ata pasi janë mbledhur aty kanë marshuar drejt parlamentit. Deri tani, kur protestuesit kanë qenë përballë kuvendit ka patur episode të tensionuara midis tyre dhe policisë ku janë hedhur molotovë, kapsolla, gaz lotësjellës edhe ujë. Por skenari i protestës së sotme mbetet i panjohur.
Megjithatë kreu i Partisë Demokratike, Basha deklaroi se protesta e sotme do të jetë paqësore dhe si garanci ai njoftoi se do të merrte pjesë me gjithë familjen e tij. Anëtarë të tjerë të frontit opozitar kanë thënë se kjo do të jetë protesta më e madhe deri tani e opozitës. Kërkesa e tyre kryesore mbetet e njejtë, dorëheqja e kryeministrit Rama.
Në protestën e shkuar, presidenti Meta deklaroi anullimin e zgjedhjeve me arsyetimin që të uleshin tensionet dhe të shmangeshin përplasjet. Në mbrojtje të dekretit të tij ditët e fundit kanë dalë Bashkitë e drejtuara nga forcat e opozitës. Ato kanë kërkuar lirimin e KZAZ-ëve por në këtë përpjekje janë përballur me policinë e shtetit dhe kjo nuk ka kaluar pa incidente. Disa arrestime janë kryer deri tani dhe një pasqyrë e gjendjes së tensionuar ishin pamjet në Shkodër ditën e djeshme gjatë tubimit elektoral të Partisë Socialiste. Një tjetër faktor që i shtohet kauzës së protestuesve janë përgjimet e publikuara nga gazeta ‘Bild’ për herë të tretë. Pavarësisht këtyre reagimi i qeverisë ka qenë mbrojtës dhe mohues ndaj akuzave.
Pra situata që i paraprin protestës së sotme është pak më e vecantë. Për këtë arsye Ambasada Amerikane bëri thirrje dje për distancim nga dhuna ndaj institucioneve dhe të rinisin dialogun.
Palët duket se janë ende larg. Kryeministri mbetet i palëkundur për të mos u tërhequr nga posti i tij. Nga ana tjetër është konflikti institucional me Presidentin Meta për datën e zgjedhjeve. Megjithë thirrjet e këtij të fundit, Rama thotë se zgjedhjet do të mbahen më 30 qershor dhe se nuk e njeh dekretin e presidentit.
Nga të gjitha palët thirrjet për protestën e sotme kanë qenë që nuk do të ketë dhunë. Por nuk ka një dakortësi që të kontribuojë në zgjidhjen e situatës. Policia ka marrë masat për mbarëvajtjen pa incidente të protestës dhe pritet që më shumë se 1500 efektivë të jenë të pranishëm. /Opinion.al
