Opozita nuk ka marrë pjesë në pritjen zyrtare me rastin e largimit të dy ambasadorëve nga vendi ynë, respektivisht Donald Lu i SHBA-së dhe Romana Vlahutin e BE-së.
Pritja ka nisur në orën 20:00 në rezidencën e BE tek Rolling Hills në Lundër. Të ftuar janë përfaqësuesit më të lartë të partive politike dhe qeverisë.
Pyetjes së gazetarëve, nëse do shkojnë apo jo në këtë pritje, i është përgjigjur kryetari i PD-së Lulzim Basha. Ai theksoi se: “Kemi parlament ne”.
Opozita vazhdon të jetë prezente në seancën plenare, ku në qendër të diskutimit është projektligji për shembjen e Teatrit Kombëtar, ndërkohë pritet që diskutimet të vazhdojnë deri në mesnatë.
Kujtojmë se dy ditë më parë presidenti i SHBA-së Donald Trump propozoi Kathleen A. Kavalec për ambasadore në Shqipëri, duke zëvendësuar pas mandatit 3-vjeçar Donald Lu. Ndërsa në vend të Romana Vlahutin, BE dërgon në Shqipëri Luigi Sorecan.
