TIRANE- Prej javësh opozita bllokon seancat plenare të së enjtes. Shkak për këtë janë bërë disa amendamente të PD që mazhoranca nuk i fut në seancë si dhe dërgimi në Kushtetuese i dy deputetëve, Rakip Suli dhe Valentina Leskaj. Po nesër në seancë çfarë do të bëjë opozita?
Kryetari i opozitës, Lulzim Basha tha se PD do të insistojë nesër në Kuvend për respektimin e vendimeve të Gjykatës Kushtetuese. Në një prononcim për mediat, Basha u shpreh se: “Nesër do të insistohet fort në zbatimin e vendimeve të Gjykatës Kushtetuese. Dy anëtarë të mazhorancës kanë përfituar fonde publike. Nesër opozita do të insistojë në kalimin e amendamentit tonë, funksionimin eficent të komisioneve hetimore”.
“Heqja e vulës së turpit, e heqja e pranisë së deputetit që ka plagosur, dhe kur ja do qejfi vjen e voton, dhe kur ja do qejfi ha e pi pranë parlamentit.
Këto do të jenë betejat e opozitës ditën e nesërme në parlament. Nga kjo do të varet funksionimi i parlamentit dhe hapat që do të hedhim.” deklaroi Basha.
