Sesioni i ri parlamentar nis më 21 janar 2019, por sot ka një seancë të jashtëzakonshme parlamentare. Sot në 17:00 do të votohen dekretet e Presidentit për ministrat e rinj të kabinetit qeveritar. Opinion.al ka mësuar se opozita do të jetë e pranishme në seancën e sotme.
Burimet thanë se kanë regjistruar emrat për të folur të gjithë deputetët e PD-së. Duket se seanca e thirrur enkas për votimin e ministrave do të ketë debate të ashpra mes mazhorancës dhe opozitës. Kjo nisur edhe nga përplasja e fundit e Ramës dhe Metës lidhur me mosdekretimin e Gent Cakës si ministër i Jashtëm.
Opozita bojkoi parlamentin në sesionin e shkuar parlamentar nga shtatori deri në dhjetor. Ajo u rikthye më 20 Dhjetor në afatin e fundit, kur rrezikonte djegien e mandateve. Në atë seancë u shënua dhe incidenti i goditjes me vezë të Kryeministrit.
