Deputeti i Partisë Demokratike, Oerd Bylykbashi në një prononcim për mediat është shprehur ditën e sotme se mazhoranca ka mohuar të drejtën e fjalës së opozitës, me pretendimin për të zhvilluar mbledhjet e komisioneve online.
Ndër të tjera në fjalën e tij Bylykbashi theksoi se opozita do të jetë prezente në komisione, në ambientet fizike të saj. Gjithashtu në fjalën e tij deputeti theksoi se nuk do të lejojnë që qeveria të kthejë në ligj aferat korruptive të qeverisë.
“Deputetëve të opozitës, iu mohua sot në kundërshtim me kushtetutën, pjesëmarrja në komisionin e ligjeve dhe e drejta e fjalës. Është qartë mënyra për të hequr transparencën e qytetarëve.
Ne jemi këtu që kjo të mos lejohet, ne do të respektojmë kushtetutën. Do të garantojmë transparencën për çdo shkelje të Edi Ramës. Nuk do të pranojmë që nëpërmjet këtyre mjeteve, me pretendimin që për arsye të pandemisë nuk zhvillohen mbledhjet fizikisht, ne do të jemi këtu për ta ndaluar këtë. Ne do të marrim pjesë në mbledhjet e komisioneve, do të jemi prezent.
Bojkoti nuk mund të jetë një vendim i Edi Ramës, ne ishim prezent. Mazhoranca, Edi Rama, po i mohon opozitës mundësinë që të marrë pjesë dhe të kundërshtojë aferat që ai do të kthejë në ligj e në këtë mënyrë të zhvasë shqiptarët çdo ditë”, tha Bylykbashi.
