Opozita e Bashkuar i është përgjigjur kërkesës së Damian Gjiknurit duke konfirmuar prezencën e saj në mbledhjen e Këshillit Politik.
Më herët Gjiknuri kërkoi një mbledhje të Këshillit për të diskutuar propozimet për ndryshimet kushtetuese që janë bërë nga opozita parlamentare dhe që janë mbështetur nga PS.
“I nderuar koleg, Në emër të opozitës, mirëpresim reflektimin tuaj për të vijuar diskutimin dhe vendimmarrjen konsensuale në Këshillin Politik për çdo çështje lidhur me zgjedhjet, siç kemi rënë dakord me shkrim në Marrëveshjen Politike të 14 Janarit dhe Dakordësinë e 5 Qershorit. Paraprakisht ju konfirmojmë se dokumenti i depozituar nga një grup deputetësh të mazhorancës dhe që përmban produktin e dakordësuar në Tryezën e Këshillit Politik (siç ju rikonfirmoni me e-mail më sipër) duhet të miratohet sa më parë dhe pa asnjë ndryshim, dhe për këtë arsye, nuk mund të rihapet asnjë çështje që është dakordësuar aty. Për çdo çështje tjetër, ne jemi të gatshëm, në orën e caktuar nga ana juaj, si të hënë ashtu edhe të martën, pa patur një preferencë për këtë. Presim konfirmimin tuaj për ditën që ju preferoni, duke shprehur gatishmërinë tonë për pjesëmarrjen në atë mbledhje.”
Por kreu i opozitës, Lulzim Basha nuk do të marrë pjesë në këtë mbledhje pavarësisht një ftese nga ana e kryeministrit Rama. Më herët Rama u shpreh i gatshëm të shkonte vetë në Këshillin Politik e të ulej me Lulzim Bashën dhe Ilir Metën.
Prania e Ramës u konfirmua edhe në kërkesën e Damian Gjiknurit i cili ftonte kreun e PD dhe të LSI të merrnin pjesë. Megjithatë kjo ftesë është refuzuar pasi në përgjigjen e saj opozita ka deklaruar se në mbledhjen e të hënës ose të martës do të jetë i pranishëm Sekretari i Përgjithshëm i PD, Gazment Bardhi.
“Në lidhje me ndryshimin e formatit të përbërjes së Këshillit Politik, nëse ju keni vlerësuar si të përshtatshme zgjerimin e përfaqësuesve të partive politike në Grupin e Punës së Këshillit Politik, atëherë ju bëjmë me dije se Opozita e Bashkuar do të përfaqësohet përveç nesh, edhe nga Sekretari i Përgjithshëm i Partisë Demokratike z. Gazment Bardhi. Mbetemi në pritje të konfirmimit të ditës nga ana juaj, Me respekt, Oerd Bylykbashi Petrit Vasili”. /Opinion.al
