Ministri i Brendshëm, Fatmir Xhafaj ka qenë sot në ambasadën amerikanë në Tiranë për ti dorëzuar një dekoratë Shefit të Zyrës Rajonale të Sigurimit në ambasadë, oficerit amerikan Jan Hiemstra.
Ministri Xhafaj vlerësoi bashkëpunimin dhe asistencën e ofruar nga Shtetet e Bashkuara të Amerikës, si një partner shumë i rëndësishëm për agjencitë ligj zbatuese shqiptare.
“Dëshiroj të vlerësoj bashkëpunimin shumë të mirë që ne kemi në fushën e sigurisë ndërmjet vendit tonë dhe SHBA-së, veçanërisht asistencën mjaft të vyer që SHBA japin ndaj agjencive të sigurisë në vend dhe veçanërisht Policisë së Shtetit, në shumë fusha. Ju sot po e përmbyllni këtë detyrë, duke lënë pas një kontribut të spikatur në mbështetje të Policisë së Shtetit në luftën kundër terrorizmit, krimit të organizuar dhe trafiqeve të paligjshme”, nënvizoi ministri Xhafaj.
Zyrtari më i lartë amerikan i pranishëm në këtë ceremoni ishte zv.ambsadori i SHBA në detyrë Ryjan Roberts.
Kjo vizitë e Xhafës në ambasadën amerikane bëhet në kohën kur opozita kërkon largimin e tij nga detyra pasi i vëllai u kap në përgjim duke folur për trafik droge. Jo vetëm kaq, por vetëm pas akuzave të opozitës, vëllai i ministrit, shtetasi Agron (Geron) Xhafaj u dorëzua në Itali për të vuajtur një dënim të vjetër për trafik drogë.
Lidhur me këtë çështje ka patur vetëm një prononcim të shkurtër disa javë më parë nga ambasadori amerikan Donald Lu i cili këshillonte Kryeministrin Rama të fliste në emër të tij sepse ambasada nga ana e saj po kryente verifikime për z. Xhafaj.
