Rudina Hajdari ka folur sot në Parlament për herë të parë si kryetare e grupit parlamentar të Partisë Demokratike. Ajo është shprehur kundër bojkotit të zgjedhjeve lokale të 30 qershorit, duke paralajmëruar se do të ketë një tentativë për të marrë pjesë në zgjedhje dhe për të përfaqësuar demokratët.
“Nuk jemi dakord për bojkotimin e zgjedhjeve të 30 qershorit. Sado e korruptuar të jetë mazhoranca, nuk duam të bojkotojmë zgjedhjet, përfshi 30 qershorin. Do bëjmë ç’të jetë e mundur të mos i lëmë demokratët pa alternativë, ftoj çdo lloj partie opozitare ta rikonsiderojë vendimin për t’i bojkotuar. Ne do të bëjmë çdo gjë, edhe pse kemi kohën në disfavor, për të shpalosur alternativën tonë”, tha Hajdari sot në Parlament.
Në fjalën e saj, Hajdari gjithashtu tha se të gjithë deputetët që janë në sallë janë përfaqësues të denjë të demokratëve dhe që kanë punuar për suksesin e Partisë Demokratike./Opinion.al
