Sot në orën 09.00 deputetë të Partisë Demokratike kanë shkuar sërish përpara Drejtorisë së Policisë së Tiranës për të kërkuar lirimin e kuksianëve që u arrestuan për protestën e së shtunës në Rrugën e Kombit. Deputetëve të opozitës janë duke iu bashkuar edhe shumë qytetarë.
24 banorët e Kukësit të arrestuar për dhunën gjatë protestës në Rrugën e Kombit kundër taksës, ndodhen në paraburgimet e kryeqytetit.
Në një raport pas vizitave inspektuese, Avokati i Popullit bën me dije se në Drejtorinë e Policisë në Tiranë po mbahen aktualisht 13 persona, në Komisariatet 1 dhe 2 nga katër persona, ndërsa tre persona të tjerë ndodhen të shpërndarë në komisariate të tjerë të kryeqytetit.
Ekspertët e Avokatit te Popullit, konstatojnë se ndonëse ndaj asnjërit prej të ndaluarve nuk është ushtruar dhunë dhe asnjëri prej këtyre të ndaluarve nuk ka pretenduar të jetë ushtruar dhunë mbi të, situata paraqitet problematike në lidhje me komunikimet formale të shkakut të privimit nga liria të këtyre personave.
Protestat për lirimin e kuksianëve nisën që dje pasdite. Janë aktualisht 24 të arrestuar, ndërsa në total Prokuroria e Kukësit ka leshuar 36 urdhër-arreste. Pra pritet arrestime të tjera.
Protesta e mbrëmshme përpara Drejtorisë së Policisë së Tiranës, pati momente tensioni. Kjo pasi disa deputetë të opozitës hynë në drejtorinë e policisë për të takuar personat e ndaluar.
Ndërkohë Këshilli Bashkiak dhe kryetari i bashkisë Kukës, Bashkim Shehu kanë kushtëzuar çdo negociatë me qeverinë për gjetjen e një zgjidhje mbi tarifimin e Rrugës së Kombit me lirimin e qytetarëve të arrestuar. /Opinion.al
*Pamje te incidentit me deputetet mbreme ne policine e Tiranes
