ORA 18:50- Lulzim Basha: Në 30 qershor nuk ka për të patur zgjedhje në Shqipëri. Këtë e di edhe bufi dhe vëllai i bufit, Edi Rama. Nuk ka zgjedhje për opozitën dhe ato zgjedhje nuk janë. Opozita nuk klonohet dhe as nuk krijohet, opozita jemi ne, të bashkuar me njerëzit. Nuk ka dhe nuk do të ketë zgjedhje në 30 qershor sepse ne jemi të vendosur të mos lejojmë më krimin elektoral. Ne nuk do të lejojmë me asnjë çmim, krimin elektoral, zgjedhje falsë në Shqipëri nuk do të ketë më. Ta dijë mirë Edi Rama se në burg do të shkojnë ata që vjedhin zgjedhjet, Vangjush Dako e bashkëpunëtorët politikë të Edi Ramës që janë kapur duke vjedhur votën e shqiptarëve.
ORA 18: 40- Lulzim Basha: Nisim sot aktin e mosbindjes civile, për ta çuar deri në fund betejën që kemi nisur e për ta kurorëzuar atë me fitore. Vendi ndodhet në udhëkryq, e ka sjellë njeri më i korruptuar më i inkrimuar që njeh historia pluralizmit. Arrogantin, hajdutin, mashtruesi Edi Rama i cili me bandën e tij i vuri shkelmin demokracisë, solli krimin në sofër.
ORA 18: 30-Protestuesit në Elbasan kanë bllokuar autostradën me Tiranën, ndërsa i kanë vënë flakën disa gomave.
ORA 18:10 – Në momentet e para ka pasur edhe përplasje mes drejtuesve të automjeteve dhe protestuesve. Në Tiranë, te sheshi “Shqiponja”, një drejtues automjeti refuzoi të ndalonte dhe është dhunuar nga protestuesit.
ORA 18:06 – Gazment Bardhi në Durrës: “Do të qëndrojmë sa të vendosin qytetarët. Do të ketë lëshime për raste urgjence”.
ORA 18:04 – Në Durrës ka pasur momente tensioni, që në fillim të protestës. Disa prej drejtuesve të automjeteve janë nervozuar nga kjo formë proteste, ndërsa protestuesit kanë bërë disa tolerime duke lënë të kalojnë disa makina me familjarë dhe fëmijë të vegjël.
ORA 18:00 – Në Elbasan është bllokuar vetëm aksi Elbasan-Tiranë dhe jo rrethrrotullimi në Bradashesh. Në krye të protestës janë vendosur ish-deputetët e PD, ndërsa të shumtë janë edhe efektivët e policisë.
ORA 17:58 – Në Milot, policia bën thirrje me altoparlant se tubimi është i paligjshëm. Një kordon i policisë është vendosur në këtë zonë.
ORA 17:55 – Kryetari i Partisë Demokratike, Lulzim Basha, u është bashkuar protestuesve në Milot atje ku do të bllokohet rruga. Protestuesit e kanë pritur kryetarin e PD me thirrjet “Rama ik”!
ORA 17:50 – Në Durrës, te “Plepat”, pak para orës 18:00, nuk janë të shumtë qytetarët e vendosur aty. Në vend të Palokës, i pranishëm në këtë protestë do të jetë Gazmend Bardhi, ish-deputeti Oerd Bylykbashi, Florion Mima dhe Oriola Pampuri.
***
Ka nisur në pesë qarqe të vendit protesta e paralajmëruar e opozitës. Kreu i PD-së, Lulzim Basha, i pranishëm në Milot ka marshuar me protestuesit të cilët thërrasin “Rama ik”. Ndërkohë, kryetarja e LSI-së, Monika Kryemadhi do të shkojë në rrethrrotullimin e Plepave ne Durrës. Bllokim rrugësh kombëtare në të gjithë Shqipërinë do të ketë në Tiranë tek Shqiponja, në Durrës tek Plepat, në Fier-Sheq dhe në Bradashesh-Elbasan.
