Të hënën, më 6 janar, në emisionin “Opinion” u diskutuan përplasjet mes ish-kryeministrit Sali Berisha dhe SPAK.
Gjykata e Posaçme riktheu masën “detyrim paraqitje” për kreun e PD, Sali Berisha. Rikthimi i kësaj mase është zbatuar këtë të hënë, ku vetë lideri i opozitës deklaroi për mediat se do e zbatonte kësaj here vendimin.
Berisha do të paraqitet dy herë në muaj para Prokurorisë së Posaçme dhe me gjasë partia e tij si kundërshtim ka për të organizuar dy herë në muaj protesta pikërisht përpara Prokurorisë së Posaçme.
Përplasa e Berishës me SPAK duket se është rikthyer sërish në qendër të vëmendjes dhe është një pjesë e elementëve që ai po përdor për fushatën politike.
Nga ana tjetër paraditen e djeshme Sali Berisha ka hedhur akuza ndaj Taulant Ballës, ku ka nxjerrë disa komunikime të ish-ministrit të Brendshëm në “Sky ECC”.
Të ftuar në studio: Ornela Çuçi, Artan Hoxha, Preç Zogaj, Ivi Kaso.
Në pjesën e parë të emisionit “31 minuta” të Qendrës për Gazetari Cilësore të mbështetur nga Zyra për Marrëdhëniet Publike të Ambasadës së Shteteve të Bashkuara të Amerikës në Tiranë flitet për një nga “plagët” që po rishfaqet në Shqipëri.
Sipas të dhënave nga Censusi rreth 48 mijë shqiptarë nuk dinë të flasin ose të shkruajnë shqip, nga të cilët 21 mijë janë persona me aftësi të kufizuara. Ndërsa 27 mijë të tjerë thjesht nuk dinë të shkruajnë shqip dhe i përkasin kryesisht moshës mbi 35 vjeç. Pra janë në një farë mënyre analfabetë funksionalë.
Në pjesën e dytë të emisionit “31 minuta” të Qendrës për Gazetari Cilësore të mbështetur nga Zyra për Marrëdhëniet Publike të Ambasadës së Shteteve të Bashkuara të Amerikës në Tiranë flitet se çfarë po ndodh me çmimet në Tiranë. Sipas indeksit të fundit të publikuar nga “Merser” për vitin 2024, Tirana renditet në vendit e 103-të në botë duke kryesuar si qyteti më i shtrenjtë i rajonit për të jetuar. Emisioni “31 minuta” tregojnë arsyet që e bëjnë kryeqytetin e Shqipërisë më të shtrenjtin e Ballkanit./Opinion.al
